Sejarah Batak 06

5. ANGKA ANAK NI SARIBURAJA

Nunga matoras eme nabinoan ni Nai Mangiringlaut, humodohodo ma ibana naeng mangintubu alai dipangido rohana do naeng jolo pajumpang ibana dohot Sariburaja asa tiur haroan tubu. Asima roha ni anggina Limbongmulana, Sagalaraja dohot Malauraja, dipangido ma sian Guru Tateabulan hujur Siringis hujur Jambarbaho nabinoanna sian tulangna i ma disombahon nasida singkat ni Sariburaja.

Ala masa do di luat i ari logo ranggapuri matutung, mijur ma nasida sude tu alaman asa martonggo Guru Tateabulan mangido udan paremean tu Mulajadinabolon. Dipangido Nai Mangiringlaut ma asa dipantikhon hujur i di pogu ni alaman, dung i martonggo ma Guru Tateabulan.

Dang sae dope Guru Tateabulan martonggo, humodohodo ma Nai Mangiringlaut, manggunjal ma na dihiringan manuk. Sidung martonggo Guru Tateabulan hu ma dibulanna, gonop diarina, toho ma dipartingkianna tiur ma haroan ni Nai Mangiringlaut, sorang ma baoa. Tompu ma matompas udan sian langit maborbor ma nasida saluhut. Dung sahat tu jabu, dibahen nasida ma goar ni dakdanak i Siraja Iborboron. Laos ala ni i ma ninna umbahen parari gurgur pomparan ni Siraja Iborboron, sai marhobot do langit sai ro do pinomat simbur molo marhorja nasida.

Ia Siboru Pareme didapothon Sariburaja do tu pambuanganna i, ndang sonang roha ni Sariburaja sai balisaon do ibana. Maralamat pandang torus ma ibana mandapothon Siboru Pareme diihuthon babiat sibolang i do ibana songon na manganggo bogas ni Siboru Pareme. Diida nasida do sobuon na pinadekdekhon ni Siboru Pareme di tongan dalan i.

Dung sahat nasida tu harangan Batu Martindi, diida ma lapelape ni Siboru Pareme asal adong dibahen ibotona i jala dao sian aek, dipaunsat ma dungkan toruan tu lambung mata mual, disima tinggal nasida. Babiat sibolang i ma tongtong ro manarui parbue ni hau dohot angka situak ni loba.

Dung i gok ma ditaonna, hu ma di bulanna, jumpang ma arina sorang ma na di bortian anak lahi. Dibahen Sariburaja ma goarna Siraja Altong ala godangan situak ni altong do balanjona. Alai maruba do muse goarna i gabe Siraja Ilontungon.

Babiat sibolang pinarjolma ni Sariburaja i pe, ditubuhon ma sada anak jolma baoa. Aris do rupa ni posoposo i tu Sariburaja alai rabuton do sude dagingna, dibahen Sariburaja ma goar ni anakna i Siraja Galeman.

Dung sorang Siraja Galeman disuru Sariburaja ma babiat i mulak tu Pusukbuhit, ibana pe pagodanggodang anakna i rap dohot Siboru Pareme. Dung magodang Siraja Galeman hurang mardomu do ibana dohot Siraja Ilontungon gabe laho ibana dompak Dairi, pomparanna ma muse marga Babiat, i ma marga Tambeski dohot marga Napagodang.

Rundut partuturan

Sar ma barita, pur alualu tu Guru Tateabulan dohot anakna Limbongmulana, Sagalaraja dohot Malauraja naung sorang Siraja Ilontungon anak ni Sariburaja sian ibotona Siboru Pareme. Marsak ma nasida ndada holan ala ni hahaila na so haholipan, alai rundut ni partuturan on ma na maol patureon. Dung mardos niroha Guru Tateabulan dohot anakna na tolu i, songon on ma dibahen nasida partuturon narundut i:

Ïa Siraja Iborboron anak siahaan do ibana di Sariburaja ai parjolo do ibana tubu sian ripena naung nirajahon i ma Nai Mangiringlaut. Ia Siraja Ilontungon anak paidua ma di Sariburaja ai parpudi do ibana tubu sian ripena na so nirajahon, alai huhut do i ibeberena, ai na marroharoha do Sariburaja dohot ibotona Siboru Pareme.

I ma umbahen didok umpama: “Paramak rere do Sariburaja, maranak huhut maribebere tu Siraja Ilontungon; alai parlage tangki do Siraja Iborboron marlae huhut maranggi tu Siraja Ilontungon”. “Dangkadangka dupangdupang matua haha do anak ni tulang”.

Martinading hata Sariburaja

Marsibunisibuni do Sariburaja manopot jabuna di Pariksabungan dina ro ibana mamereng anakna Siraja Iborboron. Dipasahat ma hujur bosi malela namargoar hujur Siborboron bahen sombana tu anakna i ala so diida tubu.

Ro dope Sariburaja mandapothon ripena dohot anakna Siraja Iborboron tu Pariksabungan. Diungkap ma hombungna i jala dibuat ma sian bagasan sada tintin sipajadijadi, senda huliman dohot batu martahan dungi ditonggohon ma hombungna i laos rapet ma langkopna.

Ditingki i nunga ditua deba muse Nai Mangiringlaut, dipaboa Sariburaja do parampuan tubuna i jala ditonahon asa bahenonna muse goarna Siboru Sanggulhaomasan. Sorang ma tutu boru i ndang sanga diida Sariburaja be i marhasohotan.

Laho ma muse Sariburaja mandapothon anakna di Banuaraja. Dipasahatma tu Siraja Ilontungon sada tintin sipajadijadi songon tanda patuduhononna tu hahana Siraja Iborboron, jala ditonahon ma: Ïa pomparan ni Siraja Ilontungon, marhahahon tulang jala martulanghon haha do tu pomparan ni Siraja Iborboron”. Dipaingot ma huhut asa marsaroha unang adong parsalisian.

Laos dipasahat ma huhut dohot pusako batu martaha i tu Siraja Galeman.

Di dok torsa, na borhat do Siraja Iborboron sian Pariksabungan mangalului amana Sariburaja, Siraja Ilontungon pe borhat do sian Banuaraja tong mangalului amana Sariburaja sian na so masibotoan gabe jumpang ma nasida di tombak Sisunut dolok ni Harianboho. Marsiranggut ma nasida alai ndang adong na talu ndang adong na monang. Alai molo maradian nasida marsiranggut ro do bodat sijumbojumbol mangummai nasida margantiganti, ujungna masisungkunan ma nasida manang ise be. Dipatuduhon be ma tintin pusaka sian amana Sariburaja, “Ho do i hahang”, ninna Siraja Ilontungon tu hahana Siraja Iborboron na umbalga sian ibana laos masihaolan ma nasida. Rap ma nasida mangalului amanasida Sariburaja alai ndang dapot gabe mulak be ma tu hutana.

Ndang adong na mamboto manang didia mate Sariburaja jala manang na didia kuburanna. Na deba mandok na laho do ibana tu Angkola sahat tu aek Parsalinan, sian i muse torus tu Barus jala mambuat boru muse disi. Alai adong do na mandok mate di Pusukbuhit jala dipamasuk Siraja Iborboron tu kuburan batu na ni dakdak pinarade ni Sariburaja hian disi.

Ultop a traditional pop gun made from bamboo

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s