Dongan di ulaon adat 10

5. MANGOMPOI JABU

Molo sahat do undangan tu tulang di goari ma i MANGOMPOI JABU alai molo holan olat ni hulahula do digoari ma i MANURUK JABU. Molo mangompoi jabu pasahaton ma pisopiso tu tulang, hulahula jala uduranna (natinogihonna) mandapot pasituak na tonggi. Sai gumodang do pisopiso sian pasituak na tonggi.

Molo mangompoi jabu, jouon ma:

– Dongan tubu

– Boru/bere

– Dongan sahuta/aleale

– Hulahula

– Tulang

Ia pangulahonna dos do tu na manuruk jabu, alai molo di ulaon mangompoi jabu sahat ma pisopiso dohot pasituak na tonggi tu tulang dohot uduranna. Patupaon ma pangupaon di parnangkok ni mataniari.

Ragam ni sipasahaton di pangupaon ima:

– Dengke

– Ulos

– Parbue gabe

Tung so sude pe ragamna di pasahat tung do uli ulaon i.

Udutudutan ni na pasahathon pangupaon ima:

– Natoras/haha/ompung

– Hulahula

– Tulang

Molo tung pe holan sahalak na pasahathon sian Natoras/haha/ompung tong do uli. Diuduti ma tu na pasahat tudutudu ni sipanganon tu hulahula laos udut muse tu marsipanganon. Na mamilang tangian sian parboru do jana na mautup sian hulahula.

Mardomu tu arga ni tingki, nuaeng on dipadomu nama asa sahali mangulahon:

– Mangupa.

– Pasahat tudutudu ni sipanganon tu hulahula

– Marsipanganon

Diatur ma tingki di na mangulahon tolu acara na diginjang i asa unang nian lewat pukkul 12.00 asa marsipanganon. Sidung marsipanganon diuduti ma muse tu na marbagi jambar dohot pasahat tumpak.

Di na pasahat hata pasu gabe, songonon ma partordingna (adong dua mansam):

Cara na parjolo:

– Mandok hata boru/bere

– Mandok hata dongan sahuta/aleale

– Mandok hata dongan tubu

– Mandok hata tulang dohot uduranna

– Mandok hata hulahula dohot uduranna

– Mangampu hasuhuton

   ü Boru

   ü Suhut bolon

Paduahon:

Mandok hata pasugabe ma:

– Tulang dohot uduranna

– Hulahula dohot uduranna

– Mangampu sian:

   ü Dongan sahuta/aleale

 ü Boru/bere

   ü Dongan tubu

Dung i, dipasahat protokol ma tu hasuhuton asa nasida masiaturan laho mangampu, songonon ma udutudutanna (andorang so mangampu dope, jolo pinasahat do pisopiso tu tulang dohot hulahula songon i pasituak na tonggi tu angka uduran ni tulang/hulahula:

Ø Boru

Ø Haha/anggi

Ø Suhut bolon

Dung simpul sude, dipasahat ma muse tu hulahula laho mangujungi dohot ende/tangiang.

Diuduti muse tu: Ulaon di na monding

Ultop a traditional pop gun made from bamboo

8 responses to “Dongan di ulaon adat 10

  1. Djanti Marpaung

    Horas ma amang, ia manungkun ma jo au, tar beha do amang partondingna dinalaho pasahathon tudu-tudu sipanganon tu hula-hula di tingki adat mangompoi jabu molo mangihuthon adat toba, jambar mangihut manang jambar adopan. Songon nagabe sungkun-sungkun rohakku taringot tu jambar mangihut dohot jambar adopan on. Hudok pe songoni amang na hea do huihuthon ulaon adat mangompoi jabu dongan tubu hu, jadi dang be parjolo dipasahat parborui ( ima dongan tubu hon ) songon tudu-tudu sipanganon tu hula-hula, alai gabe hula-hula i nama naparjolo pasahathon dengke simudur-mudur ditingki namangupa boruna. Dungi langsung na protokol ni parborui mambagi-bagi jambar nihula-hula nasida ( jambar mangihut mai didok ). Patorang damang jo tu na so mangantusi on. Mauliate

    • Horas ma tutu, tung na lambat pe iba mangalusi sungkunsungkunmuna on ala ni ulaon do dohot partingkian na so tarbahen. Tingki on ma binahen songon alus ni singkunsungkunmuna i.
      Ia mangompoi jabu ulaon na metmet do i jala ulaon ni angka suhut na sumolhot. Jala gokhonna pe olat ni tulang ni suhut do. Di ulaon mangompoi jabu tudutudu sipanganon napinatupa ni suhut, jambar adopan do i, lapatanna sude do natinonggo manjalo i jala pintor dibagihon do i sopola digorahon goar ni jambar i. Molo dengke napinasahat ni Hulahula/Tulang, ima tangiang ni Hulahula/Tulang tu hela/berena ala nunga jongjong dinasida sada jabu inganannasida, asa gabe bagas pangalapan pasupasu di berena dohot angka namangingani bagas i. Ganti ni jambar namargoar, antar balga ma dibaen suhut pisopisona tu hulahula/tulangna.

      Songonima panorangiaon sian hami.
      Mauliate

  2. Sattabi di hamu amang raja, molo dihuta nami molo didok mangompoi, Adat nabalga do alana sahat do tubona ni ari, bona tulang dohot hula2 namarhaha anggi, jala nahuboto holan sahali do boi mangompoi sibagandingtua..

  3. Horas dihamu amang ,santabi jala na manukkun majo au di hamu sada ulaon na mamompoi jabu songon dia do hata na boi si dohonon tu na mamompoi jabu molo iba boru sian hula-hula ni namamompoi jabu i

    • Anggo ulaon mamompo jabu ulaon sisada hasuhuton do i, di ulaon i intina boha ma asa na mangingani bagas i hipashipas sude. Hamu pamoruon ni hulahula ni suhut, lapatanna sahorong ma hamu dohot suhut na marulaon i, rap manghalashon ma hamu.

  4. horas amang molo mangampu sian parjabu ahama hatahon asa singkat jala merangkum sude,.ala kebetulan dalam waktu dekat naeng patupahonon mamasuhi jabu.mauliate amang.

    • Hata pangampuon ima hata mandok mauliate tu anka tutur na ro di ulaonniba, mandok mauliate di sude hata nauli dohot poda napinasahat ni angka tutur/ontangan jala mangauhon sude angka hata pasugabe naung tajalo marhite tangiang asa hot martonga jabu.

      Ido intina molo mangampu hata diulaon.

  5. Horas amang, na manungkun ma jolo ahu amang, molo di ulaon na mangompoi jabu, olat ni dia do hasasahat ni ulos dohot dengke ?

    Mauliate.

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s