Sejarah Batak 05

1. TUAN SARIBURAJA DOHOT ANGKA RIPENA

Tolu bulan dope naung sorang Raja Miokmiok, nunga ditua deba muse boru Sibasoburning. Dung i hu ma dibulanna, gok ma di taonna, sorang ma muse anakna paiduahon pinaporhas. Rap tubu do ibana dohot iponna, sisilonna pe dohot obukna nunga ganjang, dibahen nasida ma goarna “Sariburaja” jala boruna i margoar “Siboru Pareme”.

Magodang ma Sariburaja gabe sangkar dolidoli, nangkok ma ibana tu punsu ni Pusukbuhit, tinggal ma ibana disi tolu ari tolu borngin. Ditingki i mangilulu ma dagingna gabe daging na imbaru, na marsahala, na so boi taluhonon ni jolma, binatangbinatang manang begu laos pe taho.

Tubu ma rohana mamereng inganan humaliang luat i. Dinangkohi ma dolok Simanabun, dituati rura Tambunrea mamolus tombak nalimuton dohot harangan rimbunrea. Madangadang ma ibana sahat tu Barus, dapotsa ma disi bosi nasa horbo balgana di gadugadu Sitanggor, binanga buarbuar di ondingonding ni dolok. Suman tu horbo, martanduk, marpinggol jala marihur. Margoar do bosi i pantar bosi, pongatpongatan bosi, pangutpangutan bosi, bosi marihur, bosi malela. Dibuat ma ateate ni bosi i boanonna, jala disurathon ma goarna di atas ni batu i dohot agong.

Pangolion ni Sariburaja

Nunga tang daging ni Sariburaja, jumpang ma tingkina naeng mambuat boru. Ro ma Nan Tarduhir mangalapi ibana asa nangkok tu Pusukbuhit mangkatai tu Nai Mangiringlaut, boru ni Balabulan. Disura roha, boru ni jolma sapaingan di Pusukbuhit i do i. Dipatop Nan Tanduhir ma Sariburaja dohot Nai Mangiringlaut gabe marsaripe. Diboan Sariburaja ma ripena i tuat tu toru alai dang tu Sianjurmulamula diboan, manosor do nasida tu Pariksabungan. Dipajongjong ma disi jabuna, dipauli ma rumbi sian batu panimpanan ni barang pusaka pauseang nabinoan ni Nai Mangiringlaut, i ma: piso ranggajuma, hujur tombak di langit, batu martaha pompang bala saribu tulak bala saratus, tintin sipajadijadi, pungga haomasan, sande huliman, tajom bara, bodil tarsardopur, giringgiring sianting sabungan na mariaingmarloing. Ditutup Sariburaja ma rumbi i dohot hadatuonna holan ibana do dohot Nai Mangiringlaut na boi mambungka, i ma na margoar “Batu hobon”.

Hatop do ditua deba Nai Mangiringlaut, matoras ma eme binoanna i. Nunga tang nang Siboru Pareme laos soadong na marhaseangkon. Laho ma ibana tu Pariksabungan manopot ibotona Sariburaja. Nunga melengeleng rohana mida ibotona i, gere pangkataionna, peut so peut dibahen abitna, sumadoasadoa dibahen pardalanna. Hinata pe bira dohot latong, hapegani dos do rintopna. Gabe manuan bulu ma nasida di lapanglapang ni babi, patuat na so uhum ma nasida mangulahon na so jadi. Hambol ma pat ni Siboru Pareme ala ni utiutianna i, tamba ari tamba tarida ma nabinoanna i.

Sar ma barita, pur ma alualu tu pinggol ni Guru Tateabulan dohot anakna Limbongmulana, Sagalaraja dohot Malauraja. Mangasup ma anakna na tolu i ingkon mamusa Sariburaja ala dibahen haurahon.

Dipasurut Sariburaja ma langkana martabuni tu tomabak na di Pusukbuhit. Alai ala naung mangilulu i dagingna dang adong dihabiari agia begu aha sude do tunduk mamereng ibana. Ro do bodat Sijumboljumbol manarui parbue ni hau dohot situak ni loba bahen balanjona. Ro do babiat Sibolang gabe hundanganna songon panangga, tusi ibana lao tusi do diihuthon gari modom didongani do Sariburaja pola dibahen songon ripena. Nang sihulambak golanggolang jolma so begu didongani do songon jolmana. Sapala naung pur barita ni sibaoadi sahat ro di dia ninna rohana do.

Nunga dirimpu angka anggina i naung mate Sariburaja ala so hea be mumbol alai dang sonang dope roha ni anggina na tolu i. Dialap ma ibotona Siboru Pareme sian Pariksabungan diparadae ma dahanon pitu solup, sada hudon na metmet, sada sonduk, sada raut sidila ni ilik. Dipaksa ma ibotona i mangihuthon nasida tu tombak na limuton harangan longolongo. Marsomba do ibotona i manopoti salana mardongan iluilu mabakbak, alai dang dioloi Limbongmulana dohot anggina nadua i somba ni ibotona i, saut ma borhat nasida. Ganup maradian nasida, sai didekdekkon Siboru Pareme do sobuon asa adong ihuthonon ni Sariburaja mangalului ibana. Sahat ma nasida tu harangan Batu Martindi di dolok ni Sabulan. Dipauli ma lapelapena so mardorpi dohot marpantar, disi ma ditadingkon nasida Siboru Pareme dohot bohalna i.

Mulak ma nasida sahat tu Sabulan. Marbulan ma nasida natolu ingkon saroha jala satahi maralohon Sariburaja molo tung mangolu dope ibana, songon i nang tu pomparan ni Siboru Pareme, molo tung adong.

Ultop ^{a traditional pop gun made from bamboo}