Turiturian Borbor

Nienet sian buku TAROMBO PASARIBU – RAJA BONDAR

Panitia Tarombo marga PASARIBU sian Siraja BONDAR

Rangkoman Parjolo 1980

Sinusun ni: A.H Pasaribu, P.S.K, pens

Jln. Sei Putih 60 MEDAN

MARGA PASARIBU

Adong do manang piga sian na umposo manungkun panusun bukuon, sintap ni dia do na masuk tu marga Pasaribu, ala adong do diida merek ni perusahaan “PASARIBU”, gabe disungkun: Pasaribu dia do hamu? Alusna: “Pasaribu Batubara”, nasada “Pasaribu Harahap”, na sada nari “Pasaribu Malau”, dohot angka na asing dope, laos dipangido asa pamasuhon tu Torsa on hatoranganna; songon na tarsurat di toru on:

a. Haroroan ni marga di halak Batak

Dung ditua deba Siboru Baso Burning, dongan saripe ni Guru Tateabulan, disungkun ma goar ni ama ni ripena i, dipaboa ripena i ma goar ni amana: “Sibaso Burning”, gabe dibahen Guru Tateabulan ma marga ni ripena i boru “Sibaso Burning”, ai matua goar ni amana do gabe marga ni anakkonna. Ima parmulaan ni marga di halak Batak.

Anggo goar ni Guru Tateabulan, ndang pola dimargahon pomparanna, goar ni anakna Sariburaja do na parjolo dimargahon pomparanna gabe marga “”PASARIBU”; i ma humebaheba dohot marga “SUMBA”. “Siboru Sanggul Haomasan” boru ni Sariburaja na muli tu Tuan Sorbadibanua, boru Pasaribu do margana; laos i do diingot pomparan ni Tuan Sorbadibanua sahat tu nuaengon.

Di tingki ni Raja Hatorusan II/Tuan Balasahunu, pahompu ni Sariburaja, gabe dua marga ma pomparan ni Sariburaja:

  1. Pomparan ni Siraja Iborboron gabe marga Borbor, jala ala padan ni Limbong Mulana, Sagalaraja dohot Malauraja, andorang di hiringan manuk dope Siraja Iborboron, ingkon marsada nasida dohot Siraja Borbor maralohon pomparan ni Siraja Ilontungon gabe dibahen nasida ma “Raja Maropat” di Sianjurmulamula manjujung “BORBOR MARSADA”.
  2. Pomparan ni Siraja Ilontungon di Banuaraja manjujung marga Lontung.

Hinorhon ni i gabe marga Sabungan ma Pasaribu, marga parsadaan di pomparanna. Gabe adong ma tolu marga pahebaheba di pomparan ni Siraja Batak:

    1. Marga Borbor Marsada di Sianjurmulamula
    2. Marga Lontung di Banuaraja
    3. Marga Sumba di Pangururan, ai mamungka pinda nasida tusi sian Sianjurmulamula.

Dung bungkas sude pomparan ni Sariburaja sian Sianjurmulamula, gabe masibahen margana be ma na tinggal i; pomparan ni Limbongmulana gabe marga Limbong, pomparan ni Sagalaraja gabe marga Sagala jala pomparan ni Malauraja naung pinda tu Simanindo gabe marga Malau.

Ia pomparan ni Siraja Iborboron nabungkas sian Sianjurmulamula mangulahi do muse mambahen marga Sabungan Pasaribu gabe margana. Songon i do nang Ompu Tuan Rajadoli/Datu Tala dibabana na bungkas maringanan tu Dongdong Uluan, Pasaribu do dibahen margana. Tarbukti do i sian:

  1. Siboru Hutahot, boru ni Datu Taladibabana, na muli tu Raja Mangareak, boru Pasaribu do margana, laos i do diingot pomparanna di Uluan sahat tu tingki nuaeng on.
  2. Boru ni Matasopiak (anak ni Raja Sipahutar) na muli tu Sitorus Pane na di Sitorus Parsambilan, boru Pasaribu do dibahen margana, Ai marga Pasaribu do Matasopiak na pamuli boru i, gabe tongtong do martulang Sitorus i tu Pasaribu sahat tu nuaeng on.
  3. Sude do anak ni Datu Taladibabana mamangke marga Pasaribu, dung pe matorop mabue nasida di inganan na imbaru, asa gabe goar nasida be dipampe pomparanna gabe margana. Pomparan ni Raja Sipahutar gabe marga Sipahutar, pomparan ni Raja Hatioran (Datu Singa) gabe marga Harahap, pomparan ni Raja Tanjung gabe marga Tanjung, pomparan ni Ramberaja gabe marga Rambe.

Anggo pomparan ni Sariburaja II hot do marga Pasaribu; mambuat goar ni Sariburaja I marga Sabungan Pasaribu, dohot mambuat goar ni Sariburaja II mangulahi ma muse gabe marga Pasaribu. Tarbukti do i sian:

  1. Boru ni Sariburaja II sihahaan, Nai Antingmalela na muli tu Sibagotnipohan, boru Pasaribu do dibahen margana, laos i do diingot pomparan ni Sibagotnipohan sahat tu saonari.
  2. Boru ni Sariburaja II paduahon, Siboru Pantisabungan, na muli tu Babiat Naingol Sinaga, tong do boru Pasaribu margana, i do diingot pomparanna sahat tu nuaeng on.

Ia angka anak ni Sariburaja II/Datu Rimbang Soaloon, gabe marga do muse di inganan na imbaru dung mamompar nasida disi. Pomparan ni Raja Matondang gabe marga Matondang, pomparan ni Raja Saruksuk gabe marga Saruksuk, pomparan ni Raja Tarihoran gabe marga Tarihoran, pomparan ni Raja Parapat gabe marga Parapat, pomparan ni Parubahaji gabe marga Tinedung dohot marga Sitangkar.

Pomparan ni Datu Pompangbalasaribu hot do mamboan marga Pasaribu, alai anggo pomparanna, gabe mamangke marga naimbaru nama dung sidung parporangion ni Isang Maima/Datu Pulungantua dohot Datu Rimbangsaudara/Datu Marhandangdalu, songon on ma partording ni marga nasida:

1. Pomparan ni Isangmaima/Datu Pulungantua gabe marga Lubis, mambuat goar ni anakna Tumonggo Lubis.

2. Pomparan Datu Rimbangsaudara/Datu Marhandangdalu gabe tolu marga mamboanhon marga ni anakna:

a. Pomparan ni Sariburaja III mamboanhon marga sabungan Pasaribu sian Sariburaja I, marga Sabungan Pasaribu sian Sariburaja II dohot marga Pasaribu sian Sariburaja III.

b. Pomparan ni Raja Dohang gabe marga Datubara, mambuat goar na pinampe ni Datu Marhandangdalu, ala sian bara ibana martabasi; alai muba do i muse gabe Batubara

c. Raja Humbil na margoar muse Toga Gurning gabe marga Gurning

Pangarimpunanna:

I. Sude margamarga i, marga Borbor do parsadaanna (sabunganna). Molo dijouhon jambar tu marga Borbor nunga dihangkam i sude margamarga na di toru on:

1) Pasaribu 1-3 anak ni Dt. Rimbangsaudara/Dt. Marhandangdalu

2) Batubara

3) Gurning Pasaribu

4) Lubis dohot anak ni margana 4 anak ni Dt. Pulungantua/Isangmaima

5) Matondang 5-10 anak ni Sariburaja II/Dt. Rimbangsoalooan

6) Saruksuk

7) Tarihoran

8) Parapat

9) Tinedung

10) Sitangkar

11) Sipahutar 11-14 anak ni O.Tn.Rajadoli/Dt. Taladibabana

12) Harahap

13) Tanjung

14) Rambe

15) Simargolang (15) Pahompu ni O.Sahangmataniari anak ni R.Margolang

16) Limbong (16-17) dohot anak ni margana, masuk Borbor Marsada ala padan. Parsadaan ni no 16-18 didok nasida: “Nai Marata”.

17) Sagala

18) Malau

Note: Sipatangkason dope:

1. Marga Sipahutar dohot marga Harahap deba mandok anak ni Datu Taladibabana; alai deba sian nasida mandok anak ni Datu Marhandangdalu.

2. Marga Matondang, Saruksuk, Tarihoran, Parapat didok nadeba anak ni Datu Rimbangsoaloon/Sariburaja II do; hape deba sian nasida mandok anak ni Datu Marhandangdalu do.

3. Marga Tanjung deba mandok anak ni Datu Taladibabana do; alai adong do sian nasida na mandok anak ni Datu Pompangbalasaribu.

II. Na masuk tu marga Sabungan Pasaribu sian pinompar ni Sariburaja I, sude margamarga Borbor na di ginjang i so padohot Limbong, Sagala dohot Malau. Alai nang marga na tolu on, dohot angka anak ni margana tong do masuk marga Pasaribu, ala ni parhahamaranggion, dohot ala na masuk i nasida tu Borbor Marsada ala parpadananna i; tarlobi molo laho nasida tu sada luat na godang disi marga Pasaribu, asa boi sasiulaon di paradatan las ni roha manang arsak ni roha.

III. Na masuk tu marga Sabungan Pasaribu II, sian pinompar ni Sariburaja II, sude pomparan ni Sariburaja II, na masuk tu margamarga Borbor (no 1-10 na diginjang i).

IV. Namasuk tu marga Pasaribu nuaeng, sude pomparan ni Sariburaja III, i ma pomparan ni Siraja Habeahan, Siraja Bondar dohot Siraja Gorat.

Marhite hatorangan na di ginjang i boi ma maralus sungkunsungkun na di mula ni Torsa on. Boi do sahalak mamangke: 1. Margana sandiri; 2. Marga Sabungan Pasaribu paduahon; 3. Marga Borbor; 4. Marga Sabungan Pasaribu Parjolo, marguru tu kondisi dohot situasi di tingki i di luat na niingananna i.

Tiruanna rupani:

  1. Boi do marga Batubara na di Sarulla, mambahen margana Pasaribu, pasadahon dirina tu Pasaribu na disini gabe sada siulaon di paradatan di las ni roha dohot sitaonon, manang hamamaju ni usahana; mambuat marga Sabungan Pasaribu.
  2. Boi do marga Harahap na di Tarutung mambahen marga Pasaribu di perusahaan, mambuat marga Sabungan Pasaribu Parjolo, laho padengganhon parsaoranna di ingananna i.
  3. Boi do marga Malau na di Parapat mambahen margana Sabungan Pasaribu marningot Parsadaan borbor Marsada, pasanggamhon parsaoranna manang hamamaju ni usahana di inganan i.
  4. Boi do marga Harahap di Sitorang mambahen marga Sabungan Pasaribu padengganhon pardomuanna di luat i, ala Pasaribu do marga Borbor na umbalga di Toba Holbung.
  5. Boi do margamarga Limbong, Sagala, Malau mambahen marga parsadaanna “Nai Marata”; alai molo adong do marga Borbor dohot disi, ba marga Borbor Marsada do bahenonna marga parsadaan nasida, marningot padan i.

b. Marga Pasaribu gabe marga na asing

Adong sian marga Pasaribu gabe masuk tu marga na asing mangihuthon marga ni halak na nidapotna, jala ala dao ingananna sian luat ni margana hian, soadong be pardomuanna, gabe masuk nama ibana tu marga na asing di luat i paima adong sada tingki tarsingot ibana tu margana hian. Tiruanna:

  1. Pomparan ni Panjimeter na sahat tu Alas, gabe masuk do tu margamarga na adong di tano Alas; songon i do nang na sahat tu tano Gayo gabe masuk do tu margamarga na adong di Gayo.
  2. Marga Pasaribu (adong do sian Raja Habeahan, Raja Bondar, Raja Gorat) na mulak tu bona pasogitna di Pariksabungan, gabe masuk tu marga Limbong laho pasadahon dirina tu marga na nidapothonna, asa boi sada siulaon paradatan di las ni roha manang sitaonon. Alai di tingki parpudion; lumobi angka na di pangarantoan; nunga mulak muse mambahen margana: “Pasaribu Habeahan”.

c. Marga Tamba tu marga Pasaribu

Adong do na so marmarga hian, na ro maringanan tu luat na niinganan ni Pasaribu, gabe dipamasuk do dirina gabe marga Pasaribu, asa unang adong bolatbolatan, pahothon parsadaan ni na marsamarga di luat i: Tiruanna:

  1. Mangihuthon torsa di Barus, Sultan Ibrahim na ro sian terusan (Sumatera Barat) didok do ibana Pasaribu sian Bangkara, pasadahon dirina dohot marga Pasaribu na nidapothonna di Pasaribudolok. Dijalo nasida do ibana gabe marga Pasaribu. Gabe raja do Sultan Ibrahim muse di Pasaribu Tobing. Pomparanna pe gabe marga Pasaribu do. I ma nanidokna marga Tamba tu marga Pasaribu.
  2. Molo adong marga Pasaribu, na mambahen anak angkatna na so marmarga hian, tangkasma marboaboa tu raja (diadathon); gabe marga Pasaribu do i.
  3. Molo adong parumaen ni Pasaribu na so marmarga, buatonna ma marga ni simatuana manang ompungna boru, boi do nang sundut di ginjang ni i, alai adathonnonna di bagasan adat Dalihan Na Tolu, dohot ma hulahula nampuna marga i songon suhut parboru.

Boasa pola pampeon marga ni parumaen na so marmarga i? Anggo mangihuthon adat ni halak Batak, dang boi dohonon goar sidanak, manang goar-Nai…. ala ni Bao, Parumaen, Anggiboru; subang do i. Songon i do nang goar ni hahadoli, simatua ni angka ina; margana do boi jouonna. Ala ni i ma ingkon pampeon marga ni parumaen na so marmarga; angkup ni i asa adong pangamai manjalo adat dohot mangalehon adat molo adong siulaon (horja).

Hela na so marmarga pe, pampeon do songon marga ni sahalak amangboru binuatna na suman tu hora ni keluarga i, boi do adat ni i laos di tingki paruniunihonnasida. Dang boi dohonon goar ni hela, subang do i.

Sosososo:

- Ala naung jongjong do Punguan Bobor Marsada di Perumahan Bumi Mutiara Indah, Kosambi dohot Karawang, tangkas ma ta pamanat margamarga dia do na masuk tu punguan i.

- Ingkon sahata ma nian dipangantusion angka margamarga na masuk tu punguan Borbor Marsada.

- Hita sundut na umposo, godang dope na so umboto torsa na tarsurat diginjang, nienet do i asa masipaunean hita di pangantusionta be.

- Molo tung adong sala panorangionta tu angka dongan tubu manang di angka parpadanan, manat ma tapaune tu joloan ni ari. Mauliate.

Advendes Pasaribu, Perum BMI, Dawuan, Cikampek,2007

Ultop a traditional pop gun made from bamboo

59 responses to “Turiturian Borbor

  1. jadi pasaribu aha ma hamu poang? molo bondar do hamu? Bondar na dia ma hamu jala sian dia asal muna?

    mauliate

  2. Tulus Pasaribu

    Horas… Boi dora dibahen urutan ni tarobbo nakkin berbentuk silsilah asa lummura botoon nami hami akka naposo tarlumobi na di pangarantoan. (Au Pasaribu Bondar, Gomparan ni Raja Induk, Op. Makkuling sian Lintong (Borbor) Habinsaran nomor 11 sian Tuan Sarang Naiborngin)

    • Horas ma amang uda, ahu pe par kecamatan Borbor do sian Lintong. Anggo ahu gomparan ni Op Sotarhutik do, ido alana manjou uda au. Ia au no 16 ma. Silsilah na boha ma bahenon huroha? Ai i nama naummuli jala mura botoon asal ma binoto goar ni ompungniba.

      Horas ma

  3. Paradon Pasaribu

    Pasaribu Bondar, Namorasinantik, jala hutanami di Parrongitan-Pagar Sinondi Kecamatan Tarutung. Molo ahu no.15

    • molo boi kirim amang tua/uda ma tarombomuna, adong do manang piga na margoarhon Namorasinanti di tarombo ni Pasaribu Bondar. Ahu pe gomparan ni Namorasinanti do alai Pahompu ni Tuan Sarangnaiborngin, anak ni Tuan Sarangnaiborngin pe adong do namargoar Namorasinanti.

  4. Tulus Pasaribu

    Nga lam bingung au ba, sian dia do huroa etongon ta nomor sada? sian Saribu Raja III do manang sian Raja Bondar? Jala tarombo naadong di au sian huta dietong sian Tuan sarang Naiborngin nomor sada. Sian si Raja Bondar tu Tuan Sarang Naiborngin dang dapot ahu be hubunganna. Jadi tolong majo ba, asa takkas atik na so maramanguda do hamu. Maksud ni iba disi ummura dora botoon molo berbentuk Struktur dibaen. Horas ma ate.

  5. Beta hita Pasaribu mardalani tu http://www.sariburaja.co.cc
    Molo ndang adong dope goarta (keluarga) tarsurat di si ,langsungma takirim tarombonta tu ultopultopg@gmail.com (biasanya 3×24 jam sdh tersedia)

  6. Horas ma amang, tambahon majo muse ditarombotai ima siang gomparan op.makkuling (Pidori):
    1. Basar ( abakna: 1.Punguan 2. Ricardo)
    2. Sariaman (anakna: 1. Berlin (anakna:1. Philip) 2. Lasron)
    3. Parel0 (anakna: 1. Septian)
    4. Darbinton (anakna:1. Daniel 2. Steven)

    • Mauliate, tinambahon pe ate alai sabar ma jolo hamu. Boha molo nabinahenmuna on anak paopathon si Darbinton do molo tarombo nabinahen anak palimahon do ibana ai adong dope hahana si Barita, patorang hamu ma jolo taringot tusi. Horasma

  7. rianto pasaribu

    Horas ma di hita sude pomparan ni ompunta Pasaribu na adong di portibion, tapasa ma rohanta majujung goar ni ompunta, taingot ma patik pa 5 hon i, asa dilehon Tuhanta di hita angka pasu pasu Na.

  8. belman tarihoran

    mauliate bapatua… semoga masukan nya lebih bermanfaat buat kami… dan kami harap lebih sempurna lagi informasi nya. horas.

  9. Molo boi tulang manungkun ma jolo beremon.Ia Ompunami si Ampuljulu br Pasaribu natu Toga Manurung tubu ni na diama tulang,songoni si sumaing br Pasaribu namangganti si ampuljulu ala monding,hubege hami maennni si ampuljulu. Mauliate .

    • Tung mansai maol do alusan sungkunsungkunmuna on, ai tangkas do taboto ianggo tarombo holan tu bawa do i dibahen dang hea dipatuduhon boru anggo di tarombo. Ia molo boru holan sundut na jumonok nama namamboto i. Naporlu botoon muna ise ma goar ni tulangmuna na maribotohon manang natoras ni namborunami Ampuljulu dohot si Sumiang i asa boi ditelusuri.

      Mauliate

  10. Imanuel Xaverdino W P

    Syalom…. Horas…. Patandahon diri ma hami ima natarsurat di buku tarombo si raja bondar sian garis turunan Ginjang Raja torus tu pomparan ni Op Abel torus Gr Japet torus opung nami st Paul Blucher torus natoras nami ima Kapten Cpm J H Pasaribu sahat ma tu ahu anakna Imanuel Xaverdino Wiratama Pasaribu (pelajar kls.3 smp xaverius jbi) . Songot natarsurat di buku tarombo Si Raja Bondar holan sahat to opung nami st Paul Blucher. Br Panggabean. Jadi dang masuk dope na tuatua nami. Ia opung nami st Paul Blucher, mananakkon 4 baoa 2 boru ima : 1. Drs Dokles/br Simanjuntak ; 2. Kapten Cpm Jhon Hahomion/br Tambun ; 3. Omia Abel(+), ST /br Sirait ; 4. Relieve Sane, SS / br Panggabean. Boru ima : 1. Lannaria mt Sinambela ; 2. Grace Tiar mt Sihite. Botima tarombo sian keluarga nami. Ahu Imanuel Xaverdino Wiratama Pasaribu, anak ni da amang Kapten Cpm Jhon Hahomion Pasaribu, na tinggal di Asrama CPM Jelutung Jambi. Namanurat blog on. Syalom… Horas…
    [catatan : nunga hubaen silsilah sian mula Si Raja Batak sahat tu ahu, anggo ise naeng mamboto boi do kukirim tu sude pomparan ni Si Saribu Raja III / namora sinanti . oke]

  11. Imanuel Xaverdino W P

    Na adong di buku tarombo (http://www.4shared.com/document/dAVSgM9C/TAROMBO_PASARIBU_HaBoGo_KOMPLI.html) , halaman 77, nomor induk 0.2.1.1.4.5.1.1.2.2.1.4.2 . anak ni st Paul Blucher / br Panggabean : 1. Drs Dokles/br Simanjuntak ; 2. Kapten Cpm Jhon Hahomion/br Tambun ; 3. Omia Abel(+), ST /br Sirait ; 4. Relieve Sane, SS / br Panggabean. Boru ima : 1. Dra Lannaria mt Sinambela ; 2. Dra Grace Tiar mt Sihite. Ima na kurang di buku tarombo pasaribu Si Raja Bondar sian hami.

  12. Wanson Pasaribu (Pekanbaru)

    W. Pasaribu (Pekanbaru)
    Ai holan tarombo ni Pasaribu Bondar do tahe na tarsurat on. Hape iba Pasaribu Gorat do. Molo boi nian bahen Amangtua ma jolo Tarombo ni Gorat, asa binoto garis keturunan ni Iba. Mauliate Amangtua.

  13. Borbor Marsada

    Santabi jo bah..
    asa unang salah hita…Bona Ni ari ni Sitorus Pane Parsambilan boru Lubis do, ndang boru Pasaribu. Boi do sungkunonmuna angka sitorus Pane sian parsambilan (pomparan ni op. Mata SOpiak). Martulang pe angka Sitorus tu pasaribu, alana di boto Halaki marhamaranggi do Lubis to Pasaribu. NDa tung alana di jou SItorus tulang tu Marga Pasaribu, laos di ta dok boru Pasaribu na dialap ni Mata sopiak.

    Asa jelas, laho hamu tu tugu ni Mata Sopiak di Parsambilan

    • Mauliate dipanorangionmuna i, alai molo pinaihutihut do angka tarombo parjolo do adong marga Sitorus sian marga Lubis manang Pasaribu adong 5 sundut marga Lubis di pudi ni marga Sitorus. Jadi dung adong 5 sundut marga Sitorus baru pe adong marga Lubis jadi bohama parjadina gabe marga Lubis bonaniari ni Sitorus Pane?

      Molo menurut tarombo ni margamarga Borbor, angka gomparan ni Datutaladibabana alias Ompu Tuanraja Doli mamangke marga naimbaru isarana Tanjung, Pulungan, Lubis, Pasaribu, Harahap dll. Alai sebelumna i mamangke marga Sariburaja do. Adong 3 ompu i na margoarhon Sariburaja ima Sariburaja I anak ni Guru Tateabulan, Sariburaja II ima anak ni Raja Iborboron manang pahompu ni Sariburaja I dohot Sariburaja III na manggomparhon marga Pasaribu.

      Mungkin ala Marga Pasaribu do na totop mamboanhon goar ni ompu Sariburaja ba ala ni i ma ra umbahen di dok bona ni ari ni Sitorus marga Pasaribu.

      Mauliate

  14. darwin hasiholan batu bara

    manukun au tu bapatua.. molo marga manik masuk do i..molo masuk do patakkas bapa tua majo sian diado maraga manik i….
    Mauliate

    • Molo marga manik dang masuk i tu marga-marga Borbor. Anggo anak ni Guru Tateabulan ima: Raja Miokmiok, Sariburaja, Limbongmulana, Sagalaraja dohot Silau raja. Marga marga Borbor ima gomparan ni Raja Iborboron tubu ni Sariburaja. Inaggo marga Manik gomparan ni Silauraja do.

      Mauliatema

  15. jadi di dia do posisi ni si raja hatorusan I, II, III.. ai nabinoto salelengon sian i do muncul sangmaima dohot marhardang dalu..patanghas jo bo appara???

    • Anggo na margelar Raja Hatorusan I ima Raja Uti/Raja Miokmiok/Raja Gumelenggeleng

      Anggo na margelar Raja Hatorusan II ima Tuan Balasahunu

      Anggo na margelar Raja Hatorusan III ima Datu Rimbangsaudara

  16. Syalom…. Horas…. Patandahon diri ma hami ima natarsurat di buku tarombo ta,,,au pasaribu habeahan sian sidikalang,,,
    santabi hian jo bah akka oppung doli, abang, appara dhot anggi,,,

    sebenarna na pas goar ni persatuan ni marga taon aha do bah,,,
    borbor do manang naimarata,,,
    songoni ma,,,

    horas,,,,sayalom

    • Molo au na marmarga Pasaribu ima pomparan ni Raja Iborboron ba na masuk tu rohangku punguan Borbor ma ai i do na mamboan goar ni ompungku, anggo Naimarata dang huantusi sian dia asalna. Mauliate

  17. ndank tarihoran

    horas…
    mauliate amangtua,,, smga masukan dan informasinya bermanfaat bwt pomparan borbor marsada…
    dan klo bsa tarombona d buat dalam bntuk silsilah dan lbih lengkap lgi…
    mauliate…

  18. au matondang nasian madailing , sapetona marga matondang sian dia do asalna ? tolong di balasa hamu namamboto anso ulang bingunga au pala adong namarsapa satontang nimarga matondang

    SIAN Ahmad Hakim Matondang, SH.

    • Adong ma ompungta margoar Datu Marhandangdalu, onom ma anak na ima 1. Sariburaja III (Pasaribu), 2. Batubara, 3. Matondang, 4. Tarihoran, 5. Parapat dohot 6. Saruksuk

      Songoni ma tarombo anggo di Tapanuli

  19. tumpal pasaribu

    Horas….
    au Tumpal hasiholan pasaribu(bondar),
    pinomparni pu mangalumpat pasaribu/br.simanjuntak na di lmbn hariara dsa. haunatas-lguboti..
    juda pasaribu(opunghu) anakna 1 Baston turman pasaribu Amd.(bapaku)
    Anakna sian istri pertama 1 Tumpal H pasaribu(ima ahu sandiri)
    anakna sian istri paduahon 1 Efendi pasaribu(hujou abang ala ibana parjolo tubu)
    Satabi ma dihmu akka natorashu, aong sukkun2 hu tu hmuna
    1: ise do sasintongna siangkangan antara lubis dohot pasaribu(habeahan,bondar,gorat). alana dang jelas dope huboto ise siangkangan jala siandia dalan na???
    tolong patorang hlak bapa majo siani???
    2:Molo diparadaton di halak batak ise do siangkangan, au(tumpal) anak sian istri peratama manang efendi pasaribu anak sian istri paduahon alai pajolo tubudo ibana sian au……??
    Mauliate….
    “HORAS”

    • dang adong dope goramu dapot au di tarombonta Pasaribu molo porlu di ho tarombo Pasaribu kirim ma email tu advendespsrb@gmail.com

    • Alushu:
      1. Datu Pulungantua (Isangmaima) anakna ma marga Lubis, alai Datu Marhandangdalu (Datu Dalu) pahompuna ma marga Pasaribu. Anggo Datu Marhandangdalu anggi ni Datu Pulungantua do, jadi ho ma jolo mangalusi sungkunsungkun mi, ise do siangkangan Lubis do manang Pasaribu?

      2. Ianggo di paradaton Batak ninna dang boi morot anggo jabu bona, jadi molo na marulaon adat do hamu ba ho ma Tumpal na gabe sihaan, alai anggo dipanjouon siganup ari, songon di Samosir rupani ba na parjolo tubu do sihaan alai tong do anggo di ulaon adat sihahaan i ba tubu ni parjabu bona ma ima sian ina na parjolo.

      Mauliate ma

  20. horas….
    mnukun jo au bapa…
    ise do siangkangan lubis manang pasaribu…
    jala patorang bapa jo…..
    sian: tumpal pasaribu…..
    mauliate…..

    • Anggo Lubis ima anak ni Datu Pulungantua (Isangmaima), anggo Pasaribu ima pahompu ni Datu Marhandangdalu (Datu Dalu).

      Sementara na huboto, Datu Marhandangdalu (Datu Dalu) ima anggi ni Datu Pulungantua (Isangmaima).

      Jadi ho ma jolo poang Tumpal Pasaribu, manjou aha ma Pasaribu tu Lubis?

      Dalan masitandaan anggo au Pasaribu Bondar, Raja Induk no 16 ma.

      Mauliate

    • Datu Pulungantua (Isangmaima) anakna ma marga Lubis, alai Datu Marhandangdalu (Datu Dalu) pahompuna ma marga Pasaribu. Anggo Datu Marhandangdalu anggi ni Datu Pulungantua do, jadi ho ma jolo mangalusi sungkunsungkun mi, ise do siangkangan Lubis do manang Pasaribu?

      Mauliate

  21. Taufik pasaribu

    Horas tu sude pomparan ni pasaribu…
    Patanda diri majo au,.
    Ia goarhu taufik pasaribu
    Anak ni togar pasaribu br sirait
    Pahompu ni mangaraja pasaribu br simanungkalit..
    tinggal di butar,siborong2…
    Ia ompunghu Nunga marujung…
    Molo hami pasaribu habeahan do alai dang huboto nomor piga hami alana sian opung ni opung hu pe didok do dang marnomor hami…
    Ia sukkun2 hu tu hamu opg,bapa tua,bapa uda,abang dohot anggi niba akka na umboto:
    1. Na piga do habeahan,na adong do tong marga habeahan sian limbong?
    Ai molo hami,asli habeahan do sian si sariburaja III..
    2. Molo nomor nai,sian dia dipakke..sian siraja borbor do,manang sian si sariburaja III?
    Mauliate
    Nb:nion ma no hu: 082125045240,sms hamu ma alusna,asa hu tlp hamu,alana godang dope mungkin naeng si sukkunonku…

    • Horas ma abang, mar abang ma jolo au ate paima tangkas tarombonta.
      1. Anggo Habeahan anak ni Sariburaja III holan sada do, molo na di Limbong i adong dua pandohan, pandohan ni natuatua na sian Limbong tu au sada Habeahan na sian Limbong i toho Pasaribu do i alai sebagian nari marga pomparan ni marga Limbong do nasida ima Limbong Napitupulu dibahen margana Habeahan.
      2. Nomor ni tarombonta Pasaribu dimulai ma i sian nomor sada sian anak ni Sariburaja III ai anakna do na marmarga Pasaribu, jadi Habeahan, Bondar dohot Gorat ma no 1 marga Pasaribu

      Au saonari lagi karejo di abu dhabi, molo nunga di Indonesia 28 Aug 2012, hutelepon pe ate, nomorhu 082113800822
      Horasma

  22. Mauliate bg di penjelasan mi…
    Na liburan do abg makana mulak?

  23. St Rianto Pasaribu

    Horas ma di hita sude pomparan ni Omputa Pasaribu. Ia au pomparan ni omputa Pasaribu Habeahan Sunggu Raja sian Barus no ; 16, tubu jala magodang di Mandailing, saonari maringanan di Kota Batak Pekanbaru.
    Na manungkun majo au, boha na adong do hubungan ni margata tu halak Nias ???? Ai olo nasida mandok molo marga nasida Waruhu dos doi ninna tu Pasaribu, songoni Harefa dos doi tu Harahap. Au dang tarjaloi sasintong na, alai sude majo hita mangalean pandapot !!
    Mauliate…….

    • Molo didok nasida Waruhu dos do ninna tu Pasaribu manang Harefa dos tu Harahap ba di halak i ma i, molo na dos do ninna ba ingkon boi do patorangonnasida tarombona.Alai molo ro do nasida tu punguan Pasaribu jala di dok na sarupa di hita tu nasida di partuturon ala tona ni natuatua nasida ba jaloon do i, dang tulakon molo adong na ro tu punguan Pasaribu, alai molo didok do gabe marga Pasaribu nasida, dang tarjalo hita i.

  24. Horas ma di hita pomparan ni Raja Pasaribu. Patandaan diri ma jolo au, Au Pasaribu Habeahan Papaga Nalomak sian Hutanapuran no.16. Sattabi parjolo tu Appara niba.. dikoreksi molo salah.. Molo Habeahan 3 ma anakna ima 1. Sunggu Raja, 2. Papaga Nalomak, 3. Tunggul Mahulael. Tambahan didok habeahan sian limbong i ( Sesuai na dipasahat natua-tua ta di huta ) toho doi, alai molo ceritana na Anak ni Raja Habeahan nomor 2 ( Papaga Nalomak ) ma na mulak tu bona pasogit sianjur mula2- limbong sagala, jala maringanan ma di parik sabungan jadi asa unang mago warisan ni Pasaribu di huta i jala i do pangidoan ni Raja Habeahan tu anakna na tolu i ingkon adong mulak tu bona pasogit. Jala margana di bahen Habeahan ndang Pasaribu najolo i asa unang diusir jala diseat angka anggi dolina di huta i inna. botima, horas ma dihita saluhutna

    • Saonari molo sinungkun, ai tong dope diseat marga Pasaribu molo mulak tu Sianjurmulamula saonari on? Molo dang be boasa dang marga Pasaribu i dipangke mulak?

  25. hahhhahha…. kan ceritana angka ompung ta na uju i do antong. Molo hita saonari mulak tu bona pasogit marga Pasaribu do binoan, cuman na so mangopi hian rencana gabe dibahen kopi dalan marcerita hehehhehh…

    • Jadi daba abang, molo tung pe di angka ijazah nunga sanga dipangke Habeahan margana, ba molo masitandaan do dohot dongan ba marga Pasaribu ma di dok unang nian marga Habeahan. Boha roham abang?

  26. Horas
    Molo na hubotao tarombo ta… Ai Pasaribu( Datu Marhadang Dalu ) sejajar do Isangmaima, jala anggina do Isangmaima ( Datu Pulungan Tua ) molo Lubis anak ni Isang maima. Jadi sian ginjang ta enet Marga Pasaribu do mamboan. berarti lubis pahompu ni Pasaribu ( Datu Pompang Balasaribu ). Nga godang husungkun dongan tubu Lubis jala ido toho do i. mungkin saleleng on sungkun2 do ra angka dongan boasa pasaribu manjou appara manang abang, hahadoli dhot bapatua. Asa tapatingkos partaromboanta..Mauliate

    • Asa manat hita mangantusi ate, sian panorangionmuna i pe tarida anggo anak ni Datu Pompangbalasaribu ima Isangmaima dohot Datu Marhandangdalu (lapatanna namarhahamaranggi do nadua i, terlepas ise siangkangan, ai marasing pangokuon ni sadasada luat taringot tu si) tutu molo nienet adong mandok nunga sian ginjang marga Pasaribu (mamboanhon, berarti Datu Pompangbalasaribu pe marga Pasaribu ma), nda lapatanna songon pangantusionmuna i ba marga Pasaribu ma antong Isangmaima ai anak ni Datu Pompangbalasaribu do Isangmaima. Jadi boasa marga Lubis gabe pahompu ni Pasaribu?

      Jadi sungkunsungkun, manjou aha do hita tu Matondang, Sipahutar, Tarihoran dohot dongan tubunta na asing i?

      Mauliate

  27. Referensi na hujaha sian ginjang do on anggi..Marga lubis gabe marga sian goar ni anak ni Isangmaima ( Datu Pulungan tua ) ima Tumonggo Lubis. Berarti sian Tumonggo Lubis do asal dohot mulana ni Marga lubis. Jadi anggi, sungkun2 hu ? Datu Pompang Balasaribu ( Pasaribu ) manjao aha do tu tumonggo lubis.

    Jadi sungkunsungkun, manjou aha do hita tu Matondang, Sipahutar, Tarihoran dohot dongan tubunta na asing i?

    Bah ai nga lobih pistar ho anggi taringot i boasa gabe ndang taboto panjouon tu hahaanggi ta.

    Horas.. Slamat Hari Natal dan Tahun Baru ma tu sude pomparan ni Borbor Marsada.

  28. molo marga sagala ,limbong dohot malau dang dohot bor bor da bapatua

    • Toho do i, anggo marga na masuk tu Borbor ima sude marga pomparan ni Raja Iborboron do. Alai adong natuatua mandok molo Borbor Marsada dohot do ninna.

  29. mandok maulite ma iba tu opg,bp tua,abg,,,,tarlumobi tu tuan rumah hlman on,,ahu naing manukkun jo nian ,,,ttg pasari tu lubis,,,dang pola takkas dope huboto ise do haha na ,ise do anggi na.. by nalu syahrial pasaribu bondar ..no;16,,,sian op.sitorus.

    • Molo Lubis ima pomparan ni datu Pulungantua jala Pasaribu pomparan ni datu Marhandangdalu.

      Datu Pulungantua ma anggo siangkangan ba jadi marhaha ma Pasaribu tu Lubis.

      Taringot tu datu Pulungantua dohot datu Marhandangdalu, sai mangasahon hadatuon do nasida namarhahamaranggi, gabe tubu ma parporangan hadatuon alai dang adong na talu, adong do tao sipinggan dohot tao silosung di Siborongborong tanda ni parbadaan i.

  30. Datu Taladibabana

    Nai Rasaon :
    Raja Mangarerak / Hutahot (Boru Pasaribu, Boruni Datu Taladibabana)
    1. Raja Toga Manurung (Anak ni Raja Mangarerak) tu paribanna, Ampuljulu boru Pasaribu, alani monding i gantihon Sumaing boru Pasaribu ma..

    • Horas,
      Mauliate lae di penjelasanmuna, adong perbedaan pemahaman taringot tu Pasaribu na nidokmuna di son. Pangantusian saonari ia marga Pasaribu ima anak ni Sariburaja III, tolu ma marhahamaranggi ima Raja Hebeahan, Raja Bondar dohot Raja Gorat. Molo di tarombo Pasaribu, Sariburaja III lima sundut/generasi di toru ni Datu Taladibabana songononma sundutna:

      Raja Iborboron anakna, Tuan Balasahunu anakna, Datu Taladibabana anakna, Datu Rimbangsoaloon anakna, Datu Pompangbalasaribu anakna, Datu Marhandangdalu anakna, Sariburaja III anakna Raja Habeahan, Raja Bondar dohot Raja Gorat.

      Memang godang do na manungkun ise do na parjolo marmarga Pasaribu???? Molo di hami ba pomparan ni Sariburaja III do, alai godang do angka margamarga (Isarana Raja Mangareak) na mandok Pasaribu do bonaniari nasida, hape songon panorangion na di ginjang i gabe dang jumpang di tarombo ni Pasaribu sinuaeng on. Ala holan marga Pasaribu do namamboanhon goar Sariburaja ba tarjalo Pasaribu ma molo dijouhon bonaniari ni marga na asing anggo mangihuthon tarombo Pasaribu ba sude ma marga Pomparan ni Datu Taladibabana na gabe bonaniarinasia i (hampir sude margamarga Borbor).

      Horas

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s